Jagdhornbläser aus dem Hintergrund. Man hört einen Knall (Schuss)

A groß` Halali wird in Untertauern im Herist blasn,

insre Jaga hambs wieder schneidig tuschn lassn.

Aber so wia früahra is halt a neamma die Jagarei,

dia Zeitn sand scho längst vorbei:

A Pirschgang va mehras Stundn,

z`Fuaß aufi auf d`Höch va ganz heruntn.

Heit foahrt ma vielfach mitn Auto auf die Pirsch,

so mancher Jagdgast dagangert`s ja nit aufn Hirsch.

Muaßt eahm schiaga no die Bix ei(n)richtn,

dahoam dazöhlns` nocha die abenteurlichstn Gschichtn.

Hiatz wer(d) i aber a gach zuakehrn ban Kohlmayr zan Jagerstammtisch,

dass i no an etla Jagergschichtln dawisch.

Nach die Häupter va die Hirschn auf die teuern Autos und Trophäen,

gibt’s da drei(n) sicher allerhand z´dazöh(l)n.

Jägerrunde am Stammtisch

Die Jäger gestikulieren und übertreffen einander in ihren
jagdlichen Schilderungen – Jägerlatein pur. (Pantomime!)

Weidmannsheil Franz, sitz di her za ins. - Kellnerin bring eahm gach a Halbe!

So und hiatz trink ma no amoi aufn Franz sein guatn Hirsch – Weidmannsheil!

Guat dass d` a da bist, sing ma a gscheits Jagaliadl, stimm o.

 Lied: Die Gamsal schwarz und braun

Ja, oans is bliebn va früahra za heit,

dös Jägerlatein, liabe Leit:

`s Dazöh(l)n tuat en Franz narrisch gfrei(n):

„Dreiß`g Stuck Gams werdn`s gwesn sei(n).“

Vielleicht woar`s aber eh glei oa(n)s,

kunnt a sei(n) überhaupst koa(n)s.

Bsunders ba die Hirschn eahnan Gweih

is gern a Portion Latein dabei.

So vie(l) Endn sand`s gwen,

dass is` kamb ho kinna zöhln.

Lost oft gnuag zua, nocha kimmst scho drauf,

es hat nit a jeda Hirsch a Krone auf,

a nit a jeda Bock is kapital,

oa sand  lötz, mittl, ganz normal.

Va an Jagagschichtl soit ebbas hänga bleibn,

drum muaß a Jaga iawandst übatreibn.

Dös tean aber a gnuag andere Leit,

überall, za jeder Zeit.

Franz, Lois, seid`s narrisch, daußt werds scho schiaga Tag,

höchste Zeit zan Hoamgeh, goar koa Frag.

Oder gehn ma glei auf die Morgnpirsch,

woaßt eh, obn auf´n Schrotterberg, der guate Hirsch.